Presentamos hoxe , día 27 de Abril, o traballo de creación , elaboración e redacción dunha revista. Unha revista dixital na que pretendemos teña cabida a riqueza da vida académica deste Centro.

Precisamos que os rapaces e os non tan rapaces estean preparados para adquirir os coñecementos que os han levar a enfrentarse a todos os retos que lles vai plantexar a sociedade na que van a formarse e traballar: necesitan destrezas, precisan autonomía, precisan “aprender a ser”.

Di Manolo Rivas: “Que do maestro agárdase ás veces demasiado , pero…que sorte que agarden de un algo!” Pois ben, ao fío destas palabras, un grupo de mestres do CEIP Valle Inclán crean un Grupo de Traballo. Son conscientes de que para atender ás necesidades educativas dos alumnos que pasan polas nosas mans, é necesario estar dispostos a propiciar un intercambio de experiencias con outros mestres e fomentar os traballos en equipo. Estas son as bases firmes dunha laboura educativa: "querer ser para poder estar", coa fin de chegar a un compromiso de formación de todos os docentes en continua renovación , e de ofrecer á sociedade e aos membros que a van formar, os discentes, o que ela nos esixe.

Pedimos a todos os membros do Centro a colaboración facéndonos partícipes das súas ideas, dos seus proxectos e das súas inquedanzas.E se aos rapaces lle pedimos que saiban compartir, non será menos con nós. Compartamos vivencias, traballos das aulas, formación. Enriquezamos o noso traballo xuntos. Esta vai ser a imaxe do noso quefacer nas aulas.

Estamos inmersos, todos: pais, alumnos, mestres, administración,…, nun mundo no que as novas tecnoloxías son parte da vida cotiá. Pois, adiante con elas!. Temos xa unha revista dixital na que o Grupo de Traballo vai ser, dende xa mesmo, o fío conductor de entrada para que vós, compañeiros, vaiades elaborado e "colgando" os vosos artigos e, hoxe, somos cinco membros con moita ilusión, mañá queremos ser...todos.Os cinco compañeiros tan ousados son os da foto nunha das súas reunións de traballo, que como vedes, pásano ben, aínda traballando.